بسم الله الرحمن الرحيم
النهاردة مع قصة جديدة ويوم جديد من قصص القرأن ، خدوا بالكم ان كل يوم بتكلم عن قصة فى إتجاه مختلف خالص
ِ
طيب هبدأ القصة إزاى :
بصوا يا جماعة أعقد حاجة فى الدنيا النفس البشرية ، فالنفس أنواع :
نفس شجاعة - نفس جبانة
نفس قوية الإرادة - نفس ضعيفة الإرادة
نفس منضبطة - نفس فوضوية
نفس انانية - نفس مخلصة
كل واحد بينه وبين نفسه يشوف نفسه اى نفس من دول ، طب هل كل النفوس دى لو وحشة وموجودة فيك ينفع تتصلح - اه طبعا ينفع تتصلح بالتدريب ، فمحاضرة النهاردة وقصة النهاردة هى قصة النفوس القوية والنفوس الضعيفة
فى مقولة جميلة جدا بتقول :
( كن رجلا كألف رجل فإن لم تستطع فكن رجلا ولا تكن نصف رجل )
العبرة مش بالعدد لكن العبرة بالنفوس وقوة الإيمان ( سبحان الله )
قصة النهاردة بتحكى قصة امة كانت منهارة فيها ألاف ادعوا انهم مستعدين وجاهزين لكن مش كانوا مستكملين الأربع صفات دول :
( شجاعة - قوة الإرداة - الإنضباط – الإخلاص ) فحصلهم إيه ، قام ربنا صفاهم اربع تصفيات
كل تصفية منهم توقع صفة من الصفات ( الجبان برا - اللى معندوش إرادة برا - الضعيف برا
المتسيب برا ، فرسيوا على 313 بعد ان كانوا الاف او مئات الألاف )
القصة يا جماعة هى قصة طالوت وجالوت فى سورة البقرة من الأية 246
يالا نبدأ القصة :
حصل إيه بعد ما ربنا نجا سيدنا موسى وبنى اسرائيل من فرعون وقومه وجنوده ، ولسه ناجيين من البحر
وقال لهم سيدنا موسى : ندخل الأرض المقدسة
فقالوا : يا موسى ان فيها قوما جبارين واحنا مش هندخلها غير لما يخرجوا منها
فلو خرجوا منها احنا داخلون
ودى ( اول صفة وهى الجبن )
قوله تعالى { أَلَمْ تَرَ إِلَى الْمَلأِ مِنْ بَنِي إِسْرائيلَ مِنْ بَعْدِ مُوسَى إِذْ قَالُوا لِنَبِيٍّ لَهُمُ ابْعَثْ لَنَا مَلِكاً نُقَاتِلْ فِي سَبِيلِ اللَّهِ قَالَ هَلْ عَسَيْتُمْ إِنْ كُتِبَ عَلَيْكُمُ الْقِتَالُ أَلاَّ تُقَاتِلُوا قَالُوا وَمَا لَنَا أَلاَّ نُقَاتِلَ فِي سَبِيلِ اللَّهِ وَقَدْ أُخْرِجْنَا مِنْ دِيَارِنَا وَأَبْنَائِنَا فَلَمَّا كُتِبَ عَلَيْهِمُ الْقِتَالُ تَوَلَّوْا إِلاَّ قَلِيلاً مِنْهُمْ وَاللَّهُ عَلِيمٌ بِالظَّالِمِينَ }
فطلع اتنين من قوم موسى وقالوا ندخل عليهم ونغلبهم ( شجعان بس هما اتنين بس )
فقالوا : يا موسى انا لن ندخلها عليعم ابدا ماداموا فيها ( منتى ضعف الإرادة ) فاذهب انت وربك فقاتلا انا ها هنا قاعدون
فقال سيدنا موسى لربه : انى معيش غير انا واخى يارب
فقال الله عزو جل : انها محرمة عليهم اربعين سنة لغاية ما يتغير الجيل دا ، فالناس دى مش هتنفع
وبعدين حصل إيه :
جاء جيل جديد ومات سيدنا موسى وجاء ( يوشع بن نون ) تلميذ سيدنا موسى ، ودخل بيهم فلسطين وانتصر ومات يوشع بن نون ، فرجعوا للأول تانى وفقدوا الأربع صفات دول تانى
فربنا سلط عليهم قوم اسمهم ( العماليق ) ، تعبوهم وعذبوهم والقصة دى فى زمن العماليق وقائد العماليق اسمه جالوت
طب عمل إيه العماليق ليهم :
طردوهم من ارضهم واخذوا اموالهم ، واخذوا اولادهم عبيد عندهم ، وسبوا نسائهم واخذوا مقدساتهم لدرجة انهم اخدوا التابوت
التابوت دا على فكرة ـــــــــ صندوق كان بنى اسرائيل لما ييجوا يحاربوا ، فى معركة يقدموا التابوت دا ، فالتابوت عندهم عامل زى الراية كدا بتجمدهم
طب ليه كل دا واشمعنى التابوت دا اخدوه ؟
لأن التابوت دا فيه عصا موسى وبقية من بعض ما ترك موسى ، وبعض ملابس موسى ، وبعض ما ترك هارون اخو موسى ولوحين من التوراة فاتاخد منهم وراح عند جالوت ، وبعدين بنى اسرائيل خايفة من العماليق ، وعايشين فى جبن وعمالين يطلعوا اساطير على جالوت وعلى جيش جالوت ، وان الواحد من جيش جالوت يموت 1000 لوحده او يقولوا انهم مش بيموتوا اصلا
( فهم عملوا الأسطورة بكلامهم وخوفهم وجبنهم )
وبالرغم من ضعف بنى اسرائيل إلا انه كان فى ناس برضه لسه اقوياء ومنهم واحد
اسمه ( طالوت ) وهوا واحد من الشعب ، ليس من قادة العشائر ، والعشائر على فكرة اسمها الملأ ، وكل واحد من قادة العشائر انانيين ومختلفين ، واى واحد منهم يقدر يكون ملك على الباقيين لكنهم خايفين ان جالوت يقطع راس اللى هيمسكهم ، وبالرغم من كدا كان فيهم طالوت وشاب عنده 16 سنة وهوا راعى غنم بسيط ، انا مش هقول مين الشاب دا دلوقتى
يقول الله عزو جل :
أَلَمْ تَرَ إِلَى الْمَلَإِ مِنْ بَنِي إِسْرَائِيلَ مِنْ بَعْدِ مُوسَى إِذْ قَالُوا لِنَبِيٍّ لَهُمُ ابْعَثْ لَنَا مَلِكًا نُقَاتِلْ فِي سَبِيلِ اللَّهِ قَالَ هَلْ عَسَيْتُمْ إِنْ كُتِبَ عَلَيْكُمُ الْقِتَالُ أَلَّا تُقَاتِلُوا قَالُوا وَمَا لَنَا أَلَّا نُقَاتِلَ فِي سَبِيلِ اللَّهِ وَقَدْ أُخْرِجْنَا مِنْ دِيَارِنَا وَأَبْنَائِنَا فَلَمَّا كُتِبَ عَلَيْهِمُ الْقِتَالُ تَوَلَّوْا إِلَّا قَلِيلًا مِنْهُمْ وَاللَّهُ عَلِيمٌ بِالظَّالِمِينَ (246)
فكان بنى اسرائيل عايزين نبيهم يرسل لهم ملك يقاتلوا معه فى سبيل الله
فقال نبيهم : انا عارف نفسيتكم انكم ممكن مش تقاتلوا
فقالوا : إزاى بتقول كدا انا حنا ازاى مش هنقاتل فى سبيل الله ، واحنا عندنا حماسة شدية وانتا بتقول كدا ازاى ، على فكرة يقال ان عددهم كان ( 800 ) الف ، طب رسيوا على كام
رسيوا على 313
طب انا عرفت ازاى رقمهم :
حديث النبى عليه الصلاة والسلام
( عن البراء بن عازم فى البخارى يقول :
كنا نعد اصحاب طالوت يوم التقى مع جالوت كأصحاب النبى عليه الصلاة والسلام يوم بدر
فعرفنا انهم اتصفوا ووصلوا ل313 )
شايفين العدد الكبير وصل لإيه فربنا صفى فيهم وطلع منهم الصفات السيئة من الناس فوصلوا ل313 :
طيب هنشوف ربنا صفاهم ازاى :
1- الجبن :
فَلَمَّا كُتِبَ عَلَيْهِمُ الْقِتَالُ تَوَلَّوْا إِلَّا قَلِيلًا مِنْهُمْ وَاللَّهُ عَلِيمٌ بِالظَّالِمِينَ (246)
اول ما كتب عليهم القتال هربوا وخافوا من جالوت
( ياريت يا جماعة نشيل الجبن والخوف من جوانا ونتخذ الله وكيلا فى كل وقت وفى كل حين
ونمشى بكلمة يقينى بالله يقينى )
فهما كانوا 800 الف فبعد اول تصفية وصلوا لـ 80 الف على فكرة انا هعمل حاجة جميلة
هقول الصفة وازاى ممكن نصلحها
طب احنا ازاى نعلى موضوع الشجاعة والمبادرة ؟
بالعبادة - الإيمان - قيام الليل ، فالإيمان يحسسك بربنا وانك قوى بالله تعلمك التوكل على الله
طب التدريب على المبادرة ازاى :
( صلة الرحم - ادخل فى مواضيع ايجابية فى المجتمع - انمى الشجاعة جوايا )
وبعدين هما اللى اتصفوا دول مكنوش منضبطين - طب إزاى نبقى منضبطين ؟
1 - المحافظة على الصلوات فى اوقاتها مانتا لو صليت كل فرض فى وقته هتتعلم الانضباط
2 - رياضة يومية ساعة او مشى كل يوم
3 – قراءة كتاب اسبوعى
4 - ادور وابحث عن اكتر حاجة انا متسيب فيها واحاول اضبطها
يبقى اول حاجة الجبن
طب التصفية التانية ايه هيا ( انت مخلص ولا انانى (:
يقول الله عزو جل :
وَقَالَ لَهُمْ نَبِيُّهُمْ إِنَّ اللَّهَ قَدْ بَعَثَ لَكُمْ طَالُوتَ مَلِكًا قَالُوا أَنَّى يَكُونُ لَهُ الْمُلْكُ عَلَيْنَا وَنَحْنُ أَحَقُّ بِالْمُلْكِ مِنْهُ وَلَمْ يُؤْتَ سَعَةً مِنَ الْمَالِ قَالَ إِنَّ اللَّهَ اصْطَفَاهُ عَلَيْكُمْ وَزَادَهُ بَسْطَةً فِي الْعِلْمِ وَالْجِسْمِ وَاللَّهُ يُؤْتِي مُلْكَهُ مَنْ يَشَاءُ وَاللَّهُ وَاسِعٌ عَلِيمٌ (247)
لما قال لهم نبيهم ان ربنا بعث لكم طالوت ملكا
فقالوا : ازاى يكون له الملك علينا واحنا احق منه وهوا واحد من الناس الغلابة ويبقى قائد علينا
واستهانوا بطالوت
فهما كانوا 80 الف ربنا صفاهم فوصلوا 8 الاف ، شايفين ربنا بيصفى ازاى الناس
وقال لهم نبيهم : ان ربنا اختار طالوت وان ربنا زاده بسطة فى العلم والجسم اللى يقدر يواجه به جالوت
طب ازاى بقى ابقى مخلص ؟
1 - اعمل عمل خيرى واعمال خير للفقراء والمحتاجين عشان تجرب نفسك فى الإخلاص
2 - الدعاء من الله عزوجل دائما بأنى اكون مخلص
( على فكرة الدعاء بيعلى انزيمات الإخلاص جواك )
3 - قبل اى عمل اخد نية لله تعالى
وبعدين يقول الله عزو جل :
وَقَالَ لَهُمْ نَبِيُّهُمْ إِنَّ آَيَةَ مُلْكِهِ أَنْ يَأْتِيَكُمُ التَّابُوتُ فِيهِ سَكِينَةٌ مِنْ رَبِّكُمْ وَبَقِيَّةٌ مِمَّا تَرَكَ آَلُ مُوسَى وَآَلُ هَارُونَ تَحْمِلُهُ الْمَلَائِكَةُ إِنَّ فِي ذَلِكَ لَآَيَةً لَكُمْ إِنْ كُنْتُمْ مُؤْمِنِينَ (248)
وقال لهم نبيهم ان اية ملكه ان الملائكة تأتى بالتابوت من عند جالوت ، اللى فيه بقية مما ترك آل موسى وآل هارون هتحمله وهتحطه امام بيت طالوت ( معجزة من عند الله ) ، وبالرغم من كدا تولوا وهربوا لأن نفوسهم ضعيفة يبقى اول حاجة الجبن ، تانى حاجة انت مخلص ولا انانى
طب ايه بقى التصفية التالتة ) الإرادة ) :
يقول الله عزو جل :
فَلَمَّا فَصَلَ طَالُوتُ بِالْجُنُودِ قَالَ إِنَّ اللَّهَ مُبْتَلِيكُمْ بِنَهَرٍ فَمَنْ شَرِبَ مِنْهُ فَلَيْسَ مِنِّي وَمَنْ لَمْ يَطْعَمْهُ فَإِنَّهُ مِنِّي إِلَّا مَنِ اغْتَرَفَ غُرْفَةً بِيَدِهِ فَشَرِبُوا مِنْهُ إِلَّا قَلِيلًا مِنْهُمْ فَلَمَّا جَاوَزَهُ هُوَ وَالَّذِينَ آَمَنُوا مَعَهُ قَالُوا لَا طَاقَةَ لَنَا الْيَوْمَ بِجَالُوتَ وَجُنُودِهِ قَالَ الَّذِينَ يَظُنُّونَ أَنَّهُمْ مُلَاقُو اللَّهِ كَمْ مِنْ فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللَّهِ وَاللَّهُ مَعَ الصَّابِرِينَ (249)
فلما فصل ( نظم ) طالوت الناس واعاد تنظيم الناس المتسيبة ، وهما كانوا عطشانين جدا هيموتوا من العطش وهما كانوا داخلين على نهر ، وهما دلوقتى ما بين الأردن وفلسطين
وفى نهر هناك اللى هيعدى النهر هيلاقى جالوت وجنوده ، وبعدين ربنا هيبتليكم بنهر اللى هيشرب منه فليس منى ، يمشى واللى مش هيطعمه فهو معى إلا من اخذ غرفة بيده
غرفة بسيطة ، فأول ما شافوا المياه فقدوا ارادتهم وشربوا منه إلا قليل منهم لم يشربوا إلا غرفة بيدهم ، فنزل عددهم من 8 الاف إلى 800 فلم يقدروا ان يستحملوا لأن مش عندهم إرادة
طب ازاى بقى اجمد إرادتى ؟
1 - العبادة والقرأن ( روح - طاقة - ارادة (
2 - حط مهام معينة وحاول انك تنفذها ومش تكسل خلال شهر
3 - الرياضة - وعلى كل اسبوع تحملك هيزيد وامرن نفسى وهيعينكم على كدا الصيام فى رمضان لأن الصيام إرادة ( سبحان الله )
طب فاضل كام دلوقتى من الجيش فاضل 800 عدوا النهر وبيكملوا ، وراعى الغنم الغلام الصغير مكمل معاهم خلاص وصلوا وبقوا قدام جالوت وعدوا النهر خلاص كدا صح يا جماعة
ليه لسه ؟
لانهم اول ما شافوا جالوت وجنوده قالوا احنا مش هنقدر عليه لأن عددنا قليل فقالت الفئة قوية الإرادة كم من فئة قليلة غلبت فئة كثيرة باذن الله والله مع الصابرين.)
فربنا صفاهم حتى وصلوا إلى 313
تقول الأيات :
وَلَمَّا بَرَزُوا لِجَالُوتَ وَجُنُودِهِ قَالُوا رَبَّنَا أَفْرِغْ عَلَيْنَا صَبْرًا وَثَبِّتْ أَقْدَامَنَا وَانْصُرْنَا عَلَى الْقَوْمِ الْكَافِرِينَ (250) فَهَزَمُوهُمْ بِإِذْنِ اللَّهِ وَقَتَلَ دَاوُودُ جَالُوتَ وَآَتَاهُ اللَّهُ الْمُلْكَ وَالْحِكْمَةَ وَعَلَّمَهُ مِمَّا يَشَاءُ وَلَوْلَا دَفْعُ اللَّهِ النَّاسَ بَعْضَهُمْ بِبَعْضٍ لَفَسَدَتِ الْأَرْضُ وَلَكِنَّ اللَّهَ ذُو فَضْلٍ عَلَى الْعَالَمِينَ (251)
فلما ظهروا لجالوت دعوا الله ان يصبرهم ويثبت اقدامهم فهزموهم بإذن الله ، على فكرة الأمة دى تنتصر ويرفع شانها لما تعد نفسيا وينصلح شأنها من داخلها فييجى النصر من عند الله
واللى قتل جالوت مين قتله سيدنا داوود ، طب ازاى ظهر سيدنا داوود ؟
سيدنا داوود هوا راعى الغنم لكن كان لسه مكنش نبى وقتها ، فدا كان تمهيد لسيدنا داوود انه يبقى نبى وهوا اللى خلف سيدنا سليمان بعد كدا ، واتاه الله الملك والحكمة
( ياريت الناس الكبار مش يستهينوا بالشباب والصغار لأنهم عصب الامة ، الثورات فى بلادنا دلوقتى قامت على يد الشباب اللى الحكام استهانوا بيهم سبحان الله )
هختم بالأية :
تِلْكَ آَيَاتُ اللَّهِ نَتْلُوهَا عَلَيْكَ بِالْحَقِّ وَإِنَّكَ لَمِنَ الْمُرْسَلِينَ (252)
هى دى قصة طالوت وجالوت فى القران ياريت نفتح المصحف ونقرأه على سورة البقرة
ونعيش مع الأيات والقصة والأحداث كلها بعد ما شرحت القصة
الإثنين سبتمبر 21, 2015 1:28 am